USA မှာ အတော်များများသော ကောင်းကျိုးတွေ ရှိပါတယ်။ ဒါပေမယ့် မလွယ်ဘူး ခက်ခဲတယ် ဆိုတာလေ ဒီလိုပဲ သွားရင်းလာရင်း တွေးမိတွေးရာ လူမိုက် ဉာဏ်မီသလောက်တွေးကြည့်တာတော့ –

USA လာတဲ့သူတွေဟာ တစ်ယောက်တည်းရောက်လာတာမျိုး၊ တစ်မိသားစုတည်း ရောက်လာတာမျိုးတွေပါ။ မြန်မာပြည်မှာ ညီအစ်ကိုမောင်နှမအရင်းတွေ တစ်ဝမ်းကွဲတွေ၊ဆွေမျိုး၊ ရပ်ကွက်မိတ်ဆွေ၊ ကျောင်းနေဖက်သူငယ်ချင်း၊ ဆရာ ဆရာမများ စသဖြင့် ပတ်ဝန်းကျင်တစ်ခုလုံးကို ထားခဲ့ရတာဆိုတော့

၁ – ရောက်ရောက်ချင်း ဘယ်သူ့ကိုမှ အရင်ပတ်ဝန်းကျင်လို ခင်လို့မရသေးတော့ အထီးကျန်မယ်

၂ – အရာအားလုံးအတွက် ကိုယ်တိုင်လုပ်မှရတော့တယ် ( အရင်က လုပ်တတ်တဲ့ သူငယ်ချင်း၊ မေးစရာ ဆရာ၊ ခိုင်းစရာတပည့် အားလုံး မြန်မာပြည်မှာ ကျန်ခဲ့လို့ )
၃ – အလုပ်က ပြန်လာရင် hangout လုပ်နေကျ သူငယ်ချင်းတွေကျန်ခဲ့လို့ အထီးကျန်တာ

၄ – အစပိုင်းတော့ နေ့နဲ့ည အချိန်လွဲနေပေမယ့် လွမ်းတာနဲ့ အားနေတာနဲ့ မြန်မာပြည်က သူငယ်ချင်းတွေကို ဖုန်းဆက်စကားပြောဖြစ်သေးတယ်။ နောက်ပိုင်းကျတော့ ကိုယ်အားတော့ သူတို့က အလုပ်ထဲမှာ၊ သူတို့အားတော့ ကိုယ်ကအလုပ်ထဲမှာနဲ့ စကားပြောဖြစ်တာ နည်းလာမယ်။ အထီးကျန်လာမယ်။ အထူးသဖြင့် new year လိုမျိုးဆို ကိုယ်က ဒီမှာအော်မယ် ဖုန်းဆက်မယ်ဆို ဟိုကောင်တွေက မူးပြီးမှောက်နေပြီ။ သူတို့ဖုန်းဆက်တုန်းကလည်း ကိုယ်က အလုပ်ထဲမှာ။

၅ – အစားအသောက်ဆိုလည်း အရင်က လမ်းထိပ်က အသုတ်တို့ မုန့်ဟင်းခါးတို့ ဝမ်းတီးတူးတီး တို့ ဒန်ပေါက်တို့ ဝက်သားတုတ်ထိုးတို့ မာလာမောက်ချိုက် တို့ စားချင်ရင် ကိုယ်တိုင်လုပ်မှ ( သို့မဟုတ် ) တကူးတက သွားဝယ်စားမှ စားရတဲ့ အခြေအနေ ဆိုတော့ ငတ်လာမယ်
အားလုံးခြုံကြည့်ရင် အထီးကျန်ပြီး homesick ဖြစ်ကြတာမျိုးပါ။

၆ – နေမကောင်းဖြစ်ရင် ပိုဆိုးတယ်။ ဆန်ပြုတ်ကအစ ကိုယ်တိုင်ထပြုတ်မှ စားရတဲ့အခါ အတော်များများက အလိုလို မျက်ရည်ဝဲတတ်ကြတယ်
ဆေးရုံဆေးခန်းများတက်ရပြီဆို တစ်ယောက်တည်း ပိုအားငယ်ရလေ့ရှိတယ်

နဂိုကတည်းက တစ်ယောက်တည်း နေတတ်ရုန်းတတ်ခဲ့တဲ့သူတွေက သိပ်မသိသာပေမယ့် မိသားစု သိုက်သိုက်ဝန်းဝန်း မောင်နှမများများ နေခဲ့တဲ့သူတွေဆို အထီးကျန်တာ ပိုသိသာပါတယ်

မယုံမရှိနဲ့ ကိုယ်တွေ့
လူမိုက်ကိုယ်တိုင် ငယ်သူငယ်ချင်းတွေကို စိတ်ထဲက အမြဲလွမ်းပါတယ်

တွေးမိတွေးရာ
လူမိုက်

lumike